1ܡܐܵܕܝܼܵܐ؛ ܐܵܚܘܿܢܘܵܬܝܼ̈؛ ܚܕܹܡܘܿܢ ܒܡܵܪܲܢ. ܕܟܵܬܒܸܢ ܗܲܪ ܐܲܢܹܐ ܐܸܠܵܘܟܼܘܿܢ؛ ܠܹܐ ܣܵܩܕܵܐ ܠܝܼ؛ ܐܝܼܢܵܐ ܐܸܠܵܘܟܼܘܿܢ ܐܲܡܝܼܢܵܝܝܼ ܝܢܵܐ. 2ܗ݇ܘܹܡܘܿܢ ܗܸܫܝܵܪ ܡ̣ܢ ܟܲܠܒܹ̈ܐ؛ ܗ݇ܘܹܡܘܿܢ ܗܸܫܵܪ ܡ̣ܢ ܦܵܥ̈ܠܹܐ ܒܝܼܫܹ̈ܐ؛ ܗ݇ܘܹܡܘܿܢ ܗܸܫܝܵܪ ܡ̣ܢ ܩܛܵܥܝܬܵܐ ܕܒܸܣܪܵܐ. 3ܣܵܒܵܒ ܕܐܲܚܢܲܢ ܝܼܘܵܚ ܓܙܘܼܪܬܵܐ؛ ܐܵܢܝܼ ܕܒܸܦܠܵܚܵܐ ܝܘܵܚ ܒܪܘܼܚܵܐ ܠܐܲܠܵܗܵܐ؛ ܘܒܸܥܒܼܵܕܵܐ ܝܘܵܚ ܫܘܼܒܼܗܵܪܵܐ ܒܝܼܫܘܿܥ ܡܫܝܼܚܵܐ؛ ܘܠܹܐ ܝܘܵܚ ܒܗܹܒܼܝܼ ܥܲܠ ܒܸܣܪܵܐ؛ 4ܐܵܦܸܢ ܐܵܢܵܐ ܐܝܼܬ ܗ݇ܘܵܐ ܠܝܼ ܗܹܒܼܝܼ ܐܘܼܦ ܥܲܠ ܒܸܣܪܵܐ. ܐܸܢ ܐ݇ܢܵܫܵܐ ܐَܚܹܪَܢܵܐ ܚܵܫܸܒܼ ܕܗܹܒܼܝܼܹܗ ܒܒܸܣܪܵܐ ܝَܠܵܗ̇؛ ܙܵܘܕܵܐ ܡܸܢܹܗ ܐܵܢܵܐ؛ 5ܓܙܝܼܪܵܐ ܒܲܪ ܬܡܵܢܝܵܐ ܝܵܘܡܵܢܹ̈ܐ؛ ܡ̣ܢ ܐܘܼܓ̰ܵܓܼ ܕܝܼܣܪܵܝܹܠ؛ ܡ̣ܢ ܫܲܒܼܛܵܐ ܕܒܸܢܝܵܡܹܝܢ؛ ܥܸܒܼܪܵܝܵܐ ܒܲܪ ܥܸܒܼܪ̈ܵܝܹܐ؛ ܒܢܵܡܘܿܣܵܐ ܦܪܝܼܫܵܝܵܐ؛ 6ܒܩܲܝܪܲܬ ܛܵܪܕܵܢܵܐ؛ ܘܒܙܲܕܝܼܩܘܼܬܵܐ ܕܢܵܡܘܿܣܵܐ ܕܠܵܐ ܠܵܘܡܵܐ ܝܘܸܢ ܗ݇ܘܵܐ. 7ܐܝܼܢܵܐ ܐܲܢܹܐ؛ ܕܙܵܘܕܘܿܢܝܘܼܬܵܐ ܗ݇ܘܵܘ ܐܸܠܝܼ؛ ܚܘܼܣܪܵܢܵܐ ܚܘܼܫܒܸܢܵܝܠܝܼ ܒܚܵܬܸܪ ܕܡܫܝܼܚܵܐ. 8ܘܐܘܼܦ ܚܲܫܒܘܼܢܵܝܗܝ ܝܘܸܢ ܟܠܵܝܗܝ ܚܘܼܣܪܵܢܵܐ ܣܵܒܵܒ ܕܓܘܼܪܘܼܬܵܐ ܕܝܕܹܥܬܹܗ ܕܝܼܫܘܿܥ ܡܫܝܼܚܵܐ ܡܵܪܝܼ؛ ܗ̇ܘ ܕܒܚܵܬܸܪܹܗ ܒܟܠ ܡܸܢܕܝܼ ܩܘܼܒܸܠܝܼ ܚܘܼܣܪܵܢܵܐ؛ ܘܙܸܒܠܵܐ ܚܲܫܒܘܼܢܵܝܗܝ ܝܘܸܢ؛ ܕܠܡܫܝܼܚܵܐ ܩܵܢܸܢ؛ 9ܘܦܵܝܫܸܢ ܡܫَܟ̰ܝܼܚܵܐ ܒܝܼܹܗ؛ ܟܲܕ ܠܲܝܬ ܠܝܼ ܙܲܕܝܼܩܘܼܬܵܐ ܕܓܵܢܝܼ؛ ܗ̇ܝ ܕܡ̣ܢ ܢܵܡܘܿܣܵܐ؛ ܐܸܠܵܐ ܗ̇ܝ ܕܡ̣ܢ ܗܲܝܡܵܢܘܼܬܹܗ ܕܡܫܝܼܚܵܐ؛ ܕܝܼܠܵܗ̇ ܙܲܕܝܼܩܘܼܬܵܐ ܘܕܡ̣ܢ ܐܲܠܵܗܵܐ ܒܗܲܝܡܵܢܘܼܬܵܐ؛ 10ܕܝܲܕܥܸܢܹܗ؛ ܘܠܚܲܝܠܵܐ ܕܩܵܝܡܬܹܗ؛ ܘܠܫܵܪܝܼܟܘܼܬܵܐ ܕܚܲܫܘܼ̈ܗܝ؛ ܘܦܵܝܫܸܢ ܕܘܼܡܝܵܐ ܒܡܵܘܬܹܗ؛ 11ܕܡܩܵܘܡܵܐ ܡܵܨܸܢ ܠܸܡܛܵܝܵܐ ܠܩܝܵܡܬܵܐ ܕܡ̣ܢ ܡܝܼܬܹ̈ܐ. 12ܠܹܐ ܝَܠܵܗ̇ ܕܗܹܫ ܩܘܼܒܸܠܝܼ؛ ܝܲܢ ܗܹܫ ܗ݇ܘܹܠܝܼ ܟܵܡܝܼܠ؛ ܐܸܠܵܐ ܒܸܪܚܵܛܵܐ ܝܘܸܢ؛ ܕܡܩܵܘܡܵܐ ܡܵܛܸܢ ܠܡܸܢܕܝܼ ܕܒܘܼܬ ܕܝܼܹܗ ܡܸܛܝܸܢܹܐ ܝܼܫܘܿܥ ܡܫܝܼܚܵܐ. 13ܐܵܚܘܿܢܘܵܬܝܼ̈؛ ܐܵܢܵܐ ܒܵܗ݇ܣ ܕܓܵܢܝܼ ܠܹܐ ܝܘܸܢ ܒܸܚܫܵܒܼܵܐ ܕܡܛܹܠܝܼ؛ ܐܝܼܢܵܐ ܚܲܕَ ܡܸܢܕܝܼ ܒܝܼܕܲܥܝܵܐ ܝܘܸܢ؛ ܕܡܸܢܕܝܵܢܹ̈ܐ ܕܒܵܬ݇ܪܝܼ ܒܸܢܫܵܝܵܐ ܝܘܸܢ؛ ܘܠܐܵܢܝܼ ܕܠܵܩܵܕ݇ܡܵܝܝܼ ܒܸܦܫܵܛܵܐ ܝܘܸܢ؛ 14ܘܒܸܪܚܵܛܵܐ ܝܘܸܢ ܠܓܹܒܵܐ ܕܢܝܼܫܲܢܩܵܐ ܠܓܼܵܠܸܒܘܼܬܵܐ ܕܩܪܵܝܬܵܐ ܕܠܥܸܠܸܠ ܕܐܲܠܵܗܵܐ؛ ܒܝܼܫܘܿܥ ܡܫܝܼܚܵܐ. 15ܒܲܣ ܟܡܵܐ ܡܸܢܲܢ ܕܝܼܘܵܚ ܟܵܡܝܼ̈ܠܹܐ ܐܵܗܵܐ ܚܵܫܒܼܵܚ؛ ܘܐܸܢ ܡܸܢܕܝܼ ܒܬܵܗܵܪ ܐَܚܹܪَܢܵܐ ܚܵܫܒܼܝܼܬܘܿܢ؛ ܐܘܼܦ ܐܵܗܵܐ ܐܲܠܵܗܵܐ ܒܸܬ ܓܵܠܹܐ ܐܸܠܵܘܟܼܘܿܢ. 16ܐܝܼܢܵܐ ܠܐܵܗܵܐ ܕܡܛܹܠܲܢ؛ ܒܚܲܕَ ܩܵܢܘܿܢܵܐ ܚܵܕܪܵܚ. 17ܡܲܕܡܘܿܢ ܓܵܢܵܘܟܼܘܿܢ ܡܸܚܕܵܕܹ̈ܐ ܒܝܼܝܼ؛ ܐܵܚܘܿܢܘܵܬܝܼ̈؛ ܘܗܵܘܝܼܬܘܿܢ ܒܸܚܝܵܪܵܐ ܒܐܵܢܝܼ ܕܗܲܕܟܼܵܐ ܒܸܚܕܵܪܵܐ ܝܢܵܐ؛ ܐܲܝܟܼ ܛܘܼܦ̮ܣܵܐ ܕܒܝܼܲܢ ܐܝܼܬ ܠܵܘܟܼܘܿܢ. 18ܣܵܒܵܒ ܪܵܒܵܐ ܒܸܚܕܵܪܵܐ ܝܢܵܐ؛ ܐܵܢܝܼ ܕܪܵܒܵܐ ܓܵܗܹ̈ܐ ܐ݇ܡܝܼܪܵܐ ܝܘܸܢ ܐܸܠܵܘܟܼܘܿܢ ܒܵܗ݇ܣܵܝ؛ ܐܝܼܢܵܐ ܐܵܕܝܼܵܐ ܟܲܕ ܒܸܒܟܼܵܝܵܐ ܝܘܸܢ ܒܹܐܡܵܪܵܐ ܝܘܸܢ؛ ܕܕܸܫܡܸܢܹ̈ܐ ܝܢܵܐ ܕܙܩܝܼܦܹܗ ܕܡܫܝܼܚܵܐ؛ 19ܐܵܢܝܼ ܕܚܲܪܬܵܝܗܝ ܐܲܒܼܕܵܢܵܐ ܝَܠܵܗ̇؛ ܐܵܢܝܼ ܕܐܲܠܵܗܵܝ ܟܹܪ݇ܣܵܝ؛ ܘܚܸܩܪܵܝ ܒܢܚܸܦܬܵܝ؛ ܐܵܢܝܼ ܕܚܝܼܵܠܵܝ ܒܐܲܪܥܵܐ ܝܠܹܗ. 20ܐܝܼܢܵܐ ܕܘܼܒܵܪܹ̈ܐ ܕܝܼܲܢ ܒܫܡܲܝܵܐ ܝܢܵܐ؛ ܘܡ̣ܢ ܬܵܡܵܐ ܒܸܣܦܵܪܵܐ ܝܘܵܚ ܠܦܵܪܘܿܩܲܢ ܒܡܵܪܲܢ ܝܼܫܘܿܥ ܡܫܝܼܚܵܐ؛ 21ܗ̇ܘ ܕܒܸܬ ܡܲܚܠܸܦ ܦܲܓܼܪܵܐ ܕܡܘܼܟܵܟܲܢ؛ ܕܗܵܘܹܐ ܒܕܡܘܼܬܵܐ ܕܦܲܓܼܪܵܐ ܕܚܸܩܪܹܗ؛ ܐܲܝܟܼ ܦܠܵܚܬܵܐ ܕܒܝܼܵܗ̇ ܗ̇ܘ ܡܵܨܹܐ ܕܙܲܒܛܸܢ ܠܟܠ ܡܸܢܕܝܼ ܠܓܵܢܹܗ.